• EAPN Galicia en conxunto coa Plataforma de Organizacións de Infancia de Galicia organizan o 5 de marzo un seminario web técnico sobre o novo procedemento do certificado de familias monoparentais.

• Unha sesión práctica impartida por Cristina Blanco, subdirectora xeral de Política Familiar, Infancia e Adolescencia para explicar e resolver dúbidas sobre o novo proceso de solicitude do certificado de familias monoparentais e todas as novidades que trae consigo.

O vindeiro 5 de marzo ás 10:00 horas terá lugar o Seminario web técnico: ‘Novo certificado para as familias monoparentais’ para explicar o novo procedemento específico de solicitude e renovación do certificado de familias monoparentais.

A sesión desenvolverase en liña e será impartida por Cristina Blanco, subdirectora xeral de Política Familiar, Infancia e Adolescencia, quen presentará as principais novidades introducidas recentemente e aclarará as cuestións prácticas relacionadas coa súa tramitación.

Este encontro vén motivado polos cambios que entraron en vigor o pasado 15 de xaneiro en Galicia en relación co recoñecemento administrativo das familias monoparentais. Entre as modificacións destaca a posta en funcionamento dun novo sistema de rexistro, orientado a simplificar os trámites, reducir a documentación que deben presentar as familias e facilitar o acceso aos dereitos asociados.

Así mesmo, ampliouse o período de validez dos certificados —ata que o fillo ou filla menor cumpra 26 anos nas familias cun único proxenitor e de dous a cinco anos nas situacións de custodia exclusiva— e incorporouse a posibilidade de dispoñer do certificado en formato dixital a través da aplicación Xunta.EU.

Estas medidas facilitan a creación dun Rexistro oficial. O primeiro paso de recoñecemento destas familias para avanzar cara unhas medidas de protección urxentes. Medidas que propomos no informe «Propostas de medidas urxentes de apoio ás familias monoparentais» elaborado en conxunto coa Plataforma de Organizacións de Infancia de Galicia. .

O seminario está dirixido a entidades sociais, administracións públicas en xeral e ás profesionais que acompañen a familias monoparentais, co obxectivo de ofrecer información clara, actualizada e práctica que contribúa ao exercicio efectivo dos seus dereitos.

As persoas interesadas poden formalizar a súa inscrición a través do seguinte formulario: https://forms.office.com/e/nEdqB2MF44?origin=lprLink