• O I Congreso Autonómico sobre os dereitos da infancia reúne en Santiago a administración, entidades sociais, profesionais e persoas expertas para analizar a situación da infancia e adolescencia galega

Santiago de Compostela, 12 de xuño de 2026.- A Plataforma de Organizacións de Infancia de Galicia (POIG) celebrou o pasado venres o I Congreso Autonómico Os dereitos da infancia en Galicia: avances, retos e propostas, un espazo de reflexión, análise e intercambio que reuniu a administración pública, entidades sociais, profesionais, persoal investigador e persoas expertas para abordar os principais desafíos que afectan á infancia e adolescencia galega.

No marco do congreso presentouse o informe Os dereitos da infancia en Galicia, unha publicación elaborada pola POIG que analiza a situación actual da infancia no territorio galego desde unha perspectiva integral de dereitos, abordando cuestións como a pobreza infantil, a saúde mental, a protección fronte á violencia, a educación, a participación infantil, a atención temperá, a inclusión, a realidade da infancia no rural ou os retos da contorna dixital.

Durante a xornada, a POIG puxo de manifesto a necesidade de situar a infancia no centro das políticas públicas e avanzar cara a respostas máis coordinadas, preventivas e dotadas dos recursos necesarios para garantir o benestar de nenos, nenas e adolescentes.

Entre os principais retos identificados destacan a persistencia da pobreza infantil, as dificultades de acceso a determinados recursos e servizos en zonas rurais, o incremento das necesidades en saúde mental, a adaptación dos sistemas de protección aos novos desafíos sociais e a necesidade de fortalecer os espazos de participación infantil.

A plataforma subliñou tamén a importancia da futura Lei galega de infancia e adolescencia como unha oportunidade para consolidar un marco normativo integral que permita reforzar a protección, a prevención, a participación e a garantía efectiva dos dereitos da infancia en Galicia.

O congreso contou coa participación de representantes institucionais, profesionais dos ámbitos social, educativo e sanitario, entidades do terceiro sector e persoas expertas de referencia estatal, entre elas Pepa Horno, Sara Toledano, Ricardo Fandiño, Xosé Cuns, Mayte Celeiro, Marta Andrade e Cristina Blanco.

A través deste encontro, a POIG busca contribuír á xeración de coñecemento compartido, impulsar o diálogo entre administracións e sociedade civil e promover propostas que permitan avanzar cara a unha Galicia máis comprometida cos dereitos da infancia e adolescencia.

Xa podes descargar o informe aqui

A Plataforma de Organizacións de Infancia de Galicia é unha entidade que agrupa a máis de cincuenta organizacións sociais que traballan na defensa, promoción e protección dos dereitos de nenos, nenas e adolescentes en Galicia.