Dende a Plataforma de Organizacións de Infancia de Galicia estamos a desenvolver os talleres participativos “Coñecer para protexer”, un proxecto que levamos a cabo coa colaboración da Fundación “la Caixa”.

Estes obradoiros celébranse en diferentes entidades sociais de toda Galicia, ás que nos desprazamos para traballar directamente cos nenos, nenas e adolescentes que forman parte do sistema de protección. Son sesións moi dinámicas e participativas, nas que combinamos xogos, debate e reflexión co obxectivo de que eles e elas poidan coñecer mellor os seus dereitos, falar das súas experiencias e propoñer ideas para mellorar a súa contorna.

Que traballamos nos talleres?

🔹 A LOPIVI e os dereitos da infancia
Explicamos de maneira sinxela que é a Lei Orgánica de Protección Integral á Infancia e a Adolescencia fronte á Violencia (LOPIVI) e como esta supón un cambio fundamental: recoñece que nenos, nenas e adolescentes teñen dereito a ser escoitados e protexidos en todos os ámbitos da súa vida.

🔹 Prevención da violencia
Reflexionamos sobre que cousas son violencia —non só a física, senón tamén a psicolóxica, sexual, institucional ou a través das redes— e sobre como recoñecela a tempo.

🔹 Creación de espazos seguros
Un dos puntos máis importantes é falar de que significa un espazo seguro: un lugar no que rapazas e rapaces se sintan respectados, protexidos, libres para opinar e confiados para pedir axuda cando o precisen.

🔹 O valor do bo trato
Destacamos a importancia das relacións baseadas no respecto, a empatía e a confianza. Non abonda con previr a violencia: cómpre fomentar activamente o bo trato no día a día, tanto en familias como en escolas, centros de protección ou espazos de ocio.

Un proxecto para coñecer… e para protexer

A esencia destes talleres non é só transmitir contidos, senón tamén escoitar ás voces da infancia e da adolescencia. As súas reflexións e propostas axúdannos a mellorar a protección, a participación e a prevención da violencia.

Ademais, no marco do proxecto elaboramos unha guía xurídica online sobre o sistema de protección de menores en Galicia, pensada para achegar información clara e accesible sobre os dereitos e garantías legais das persoas menores de idade.

Pódese consultar nesta ligazón: 👉 https://xn--coecerparaprotexer-o0b.org/

Unha responsabilidade compartida

Estes obradoiros son tamén un recordatorio de que previr a violencia e fomentar o bo trato é tarefa de toda a sociedade. Só será posible garantir os dereitos se temos en conta a opinión, os soños e as necesidades de quen son protagonistas: nenas, nenos e adolescentes.

Moi pronto compartiremos máis experiencias destas sesións, pero mentres tanto deixámosvos algunhas fotos que amosan a ilusión e a participación coa que rapazas e rapaces se implican nesta iniciativa.