Unha acollida que respecte os dereitos da infancia

Segundo a Plataforma de Infancia, o recente Real Decreto Lei 2/2025 introduce cambios na Lei de Estranxeiría para regular a reubicación das nenas, nenos e adolescentes migrantes non acompañados en España. Desde a POIG, recoñecemos sumámonos á importancia de tomar medidas políticas que aseguren a protección e benestar da infancia e adolescencia migrante, facendo especial fincapé na necesidade dunha acollida que respecte os seus dereitos fundamentais.

Máis aló da normativa, a nosa prioridade segue sendo o interese superior da infancia e adolescencia. É esencial que calquera medida teña en conta as necesidades específicas de cada neno, nena e adolescente, respectando os seus dereitos e garantindo procesos de acollida que non só respondan a situacións de urxencia, senón que lles ofrezan estabilidade e acompañamento durante todo o proceso.

Un enfoque integral para a protección

Traballar desde un enfoque integral é clave para evitar que a protección da infancia dependa unicamente de solucións temporais ou puntuais. Para isto, reforzar os recursos dispoñibles e asegurar un acompañamento especializado no que se integre a mediación cultural son pasos cruciais. Unha acollida digna e respectuosa só será posible se poñemos no centro as voces e as necesidades da infancia e adolescencia migrante.

É importante que no enfoque integral se realice unha avaliación a cal non pode prescindir de dereitos tan relevantes coma a participación infantil. Todo proceso debe de realizarse coas garantías precisas de asegurar a escoita activa para calquera decisión que lles afecte.

Dende a Plataforma de Organizacións de Infancia de Galicia, unha vez se determine a minoría de idade e se incorporen ao sistema de protección galego, como queda reflexado na normativa estatal, avogamos pola priorización do acollemento familiar fronte ao residencial. O acollemento en familia supón unha convivencia estable e a mellor forma de integración dun neno, nena ou adolescente en risco ou desamparo.

Que di a normativa

Neste senso, aínda que os datos publicados referentes aos acollementos familiares representan un 51% das tutelas, esa cifra non chega ao 5% no caso destes nenos, nenas e adolescentes.

A normativa tamén concreta que os menores estranxeiros que se atopan en España teñen dereito a servizos e prestacións sociais nas mesmas condicións que os nacionais. Uns dos grupos no que especifican facer especial fincapé é no coidado dos grupos vulnerables, coma o son estas mozas e mozos.

No referente a Galicia

En Galicia estes acollementos enfócanse á integración en casas de familia ou miniresidencias, que son centros de pequeno tamaño no cal conviven con outros menores que se atopan no sistema de protección.

Entre as entidades de infancia galegas existe preocupación por como se vai plantexar neste momento a súa chegada, xa que non existen recursos suficientes no sistema de protección para albergar o número se está a barallar.

Isto sumado ao pouco marxe de tempo para poñer en funcionamento novos recursos, fai que preocupe que estes adolescentes rematen en macrocentros como os existentes noutras comunidades, que dificulten a súa integración.

Desde a Plataforma seguimos comprometidas coa Estratexia Estatal de Desinstitucionalización, a creación de espazos seguros, de escoita e participación para todos os nenos, nenas e adolescentes, independentemente da súa orixe, e reiteramos a nosa colaboración na construción dunha sociedade máis inclusiva e respectuosa cos seus dereitos.