O 13 de novembro de 2025 celebrouse en Santiago de Compostela o 25 aniversario dos CIEMAS, no Centro Galego de Desenvolvemento Integral (Cegadi). Este encontro serviu para poñer en valor o traballo educativo que se realiza con nenos, nenas e adolescentes con responsabilidades penais e para compartir experiencias e boas prácticas entre profesionais e representantes institucionais.
O director xeral de Familia, Infancia e Dinamización Demográfica, Jacobo Rey, destacou que Galicia é unha das comunidades autónomas con menor taxa de delitos en persoas de 14 a 17 anos. Ademais, sinalou que en 2024 o 86,2 % das medidas notificadas polos xulgados se realizaron en medio aberto, un récord histórico que evidencia a relevancia destes centros no sistema xudicial galego.
Un aspecto central da xornada foi poñer en valor o labor das entidades que xestionan os CIEMAS: Fundación Camiña Social, Arela, Fundación Educativa Dignidade e Centro Trama. Grazas á súa profesionalidade e dedicación, estas organizacións permiten que a intervención educativa sexa efectiva, favorecendo a non reincidencia e reducindo estigmas na sociedade.
O encontro contou tamén cunha sesión práctica a cargo de Ed Hilterman, que permitiu analizar un caso concreto e reflexionar sobre as boas prácticas na atención a infancia e adolescencia en medio aberto.
Ao redor de 90 persoas participaron na xornada, entre profesionais e representantes institucionais, reafirmando a importancia de seguir traballando en rede para mellorar a intervención educativa e sociofamiliar coas persoas menores implicadas no sistema xudicial.
