Hoxe, martes 7 de abril, o Terceiro Sector galego únese para lembrar á cidadanía a importancia de marcar na súa declaración da renda o recadro 106 do X Solidario. Ao facelo, cada contribuínte decide que o 0,7% dos seus impostos se destinen a proxectos sociais, desenvoltos por ONGS, que melloran a vida das persoas máis vulnerables. Ao marcar este recadro non pagas máis nin recibes menos na devolución da renda, pero contribúes a proxectos que apoian á infancia, adolescencia, familias, persoas maiores, persoas con discapacidade, migrantes, refuxiadas, mulleres e nenos, nenas e adolescentes vítimas de violencia de xénero, pobo xitano, comunidades rurais e persoas con problemas de adicións ou en risco de exclusión social.

Neste contexto, durante o acto conxunto no que participou a Plataforma de Organizacións de Infancia de Galicia xunto a CERMI Galicia e EAPN Galicia, púxose de manifesto a importancia de seguir reforzando este mecanismo de solidariedade.

Tal e como sinalou Inés Salteiro, directora da Plataforma de Organizacións de Infancia de Galicia, “en Galicia, case 600.000 persoas viven en risco de pobreza ou exclusión social”, polo que animou á cidadanía a contribuír a reverter esta situación, lembrando que “marcando o X Solidario, nin pagamos máis nin nos devolven menos, e podemos contribuír á realización de programas e proxectos que poden mellorar a situación de milleiros de persoas”.

O X Solidario non só apoia proxectos sociais tradicionais, tamén chega á vida política, á atención individualizada, á conciliación familiar e incluso á educación dixital. Moitos programas axudan a pechar a fenda dixital, prevén o acoso nas redes e combaten os discursos de odio.

O ano pasado, grazas ao X Solidario, 168 organizacións galegas executaron 773 proxectos, beneficiando directamente a máis de 184.000 persoas e recadando máis de 30 millóns de euros. A recadación total acadou os 30.127.138 €, cun incremento de máis de 3,6 millóns de euros respecto ao ano anterior, aínda que o número de persoas contribuíntes se mantivo estable.

Aínda así, case 700.000 persoas non marcaron o recadro (698.443), o que podería aumentar a recadación en máis de 19 millóns de euros. Delas, 578.825 non marcaron ningunha opción e 119.618 só marcaron a opción da Igrexa.

Dende o Terceiro Sector lembramos que marcar o X Solidario non custa nada e, se xa se marca a casiña da Igrexa, tamén se pode marcar a de Actividades de Interese Social, aumentando a contribución ao 1,4% do IRPF e axudando o dobre. Ademais, os fondos recadados financian programas a través de convocatorias da Xunta de Galicia, dependentes das Consellerías de Política Social e Igualdade, Cultura, Lingua e Xuventude e Sanidade, cuxos prazos actuais dificultan a planificación e execución dos proxectos.

Este 2026 queremos que as redes sociais se inunden coas etiquetas #OXestoLendario #ElGestoLegendario. Cada xesto conta para mellorar a vida de miles de galegos e galegas.