Cada ano, a solidariedade de milleiros de persoas fai posible que se leven a cabo proxectos sociais que melloran a calidade de vida da poboación máis vulnerable. No 2024, os fondos recadados a través do X Solidario contribuíron ao desenvolvemento de programas fundamentais en ámbitos como a inclusión sociolaboral, a promoción da autonomía persoal, o envellecemento activo e a prevención da dependencia.

Tamén se puxo o foco na participación activa na vida política e pública, na atención social individualizada e na conciliación e mediación familiar. Con estas accións, avanzamos cara a unha sociedade máis inclusiva e equitativa, reducindo a fenda dixital e educativa.

A recadación en España en 2024

A campaña da renda do 2024 logrou unha recadación total de 512 millóns de euros en toda España, grazas a que máis de 12.300.000 persoas marcaron o recadro de “Actividades de interese social” na súa declaración. Isto representa o 52% do total de declarantes e supón un aumento de 36 millóns de euros respecto ao exercicio anterior.

O impacto do X Solidario en Galicia

En Galicia, a achega foi de 26.520.069 euros, grazas a que 793.484 persoas marcaron o X Solidario, o que representa un 53,63% do total de contribuíntes. Esta cifra reflicte un incremento de 2.490.581 euros en comparación co 2023, grazas ao xesto de 18.089 persoas máis que decidiron destinar parte dos seus impostos a fins sociais. A contribución media por persoa foi de 33,42 euros.

Aínda que os datos son positivos, queda moito camiño por percorrer. En Galicia, 686.173 persoas seguen sen marcar o X Solidario, das cales 566.858 non marcaron ningún recadro e 119.315 só marcaron o da Igrexa. Se todas elas escollesen destinar esta parte dos seus impostos a fins sociais, a asignación final en Galicia acadaría os 44.053.850 euros, é dicir, 17.533.781 euros máis para financiar proxectos que melloran a vida de milleiros de persoas.

Un xesto que cambia realidades

Marcar o X Solidario non supón un custo adicional para quen declara a renda, pero ten un impacto directo na vida de moitas persoas. Se aínda non marcas este recadro, pensa no ben que podes facer cun simple xesto. Cada marca conta, e cada euro recadado axuda a construír unha sociedade máis xusta e solidaria.

Lembra: este ano, cando fagas a túa declaración da renda, marca o X Solidario e axuda a mellorar vidas!