A Plataforma de Organizacións de Infancia de Galicia busca acadar un maior compromiso da política local para mellorar a situación da infancia e adolescencia en Galicia

A Plataforma de Organizacións de Infancia de Galicia (POIG), con motivo da celebración das eleccións municipais o vindeiro 28 de maio presenta A infancia: unha prioridade para as axendas locais.

Neste documento a POIG expón 38 propostas de política local agrupadas en oito eixos: estrutura organizativa, loita contra a pobreza e a exclusión, saúde, atención temperá, protección, educación, violencia contra a infancia e participación infantil.

Así, as entidades que forman esta Plataforma presentan neste documento as medidas que consideran poden contribuír a mellorar a situación da infancia e adolescencia na comunidade galega.

Distintas son as problemáticas que rodean á infancia e adolescencia galega, o aumento da pobreza e a desigualdade é unha delas. En palabras de Xesús Vilas, Presidente da POIG “a pobreza en Galicia aumentou de maneira alarmante nos últimos anos, urxe reverter a situación e poñer o foco na infancia mais vulnerable. Propoñemos aquí medidas como brindar maiores apoios sociais e económicos as familias migrantes e as familias monomarentais de baixos recursos ou garantir o acceso a unha vivenda digna ás familias con nenas, nenos e adolescentes ”

Ante o crecemento dos problemas de saúde mental entre a infancia e adolescencia queremos trasladar a necesidade urxente de aumentar os esforzos por facilitar maior apoio para o coidado da saúde mental da infancia e adolescencia.

Os municipios poden ter un papel importante tamén no eido da educación, incrementando a inversión económica nas políticas destinadas a reducir as desigualdades de acceso baixo unha perspectiva de equidade que diminúa a brecha existente. Así, é importante facilitar os medios tecnolóxicos á infancia e adolescencia en risco de exclusión, reforzar os mecanismos para que todas as familias sexan coñecedoras dos programas de becas comedor ou asegurar a gratuidade do comedor para nenas e nenos en situación de pobreza extrema.

Dende a POIG defendemos así mesmo a importancia de fomentar mecanismos de consulta a nenas, nenos e adolescentes que sexan realmente participativos e que se potencien a creación de Consellos de Infancia locais para canalizar a opinión da infancia en adolescencia nas decisións que lles afecten.

Presentado estas propostas aos representantes dos distintos partidos políticos agora búscase dar a coñecer o contido do mesmo á cidadanía en xeral co o obxectivo de que reclamen aos nosos representantes un maior protagonismo da infancia e adolescencia nas axendas das políticas públicas municipais.

Sobre a POIG:

A Plataforma de Organizacións de Infancia Galega fundada no ano 2018 agrupa a 37 organizacións que comparten o obxectivo de defender, promover e protexer os dereitos das nenas, nenos e adolescentes no territorio galego