A Federación de Centros Xuvenís don Bosco de Galicia celebrou o día da mocidade o 12 de agosto en plena convivencia coa xente nova. O verán é o tempo dos campamentos, colonias e campamentos urbanos. E niso estamos implicados como Federación tódolos verán, e máis ca nunca neste verán.

Cremos importante non tanto falar da mocidade senón falar coa mocidade. Non deseñar estratexias para a xente nova senón facerlles xa protagonistas da súa vida. Cremos que a experiencia de vivir estadías con outros mozos e mozas en ambientes seguros, cheos de creatividade e alegría, de encontro informal e formal, de aprendizaxes que serven para a vida cotiá, de reflexionar sobre o sentido da súa existencia e do seu futuro, de soñar con outros novas corredoiras, de admirar a natureza, a realización humana, os outros e, quen sabe, o Outro… todo isto axuda a crecer dun xeito máis profundo e que crea alicerces para seguir vivindo a tope a vida durante todo o ano.

E neste verán máis ca nunca estamos a ofertar actividades de tempo libre educativo para:

• retomar as relacións e os procesos persoais e colectivos da infancia e da xuventude;
• non estigmatizar a poboación máis vulnerable;
• avaliar os impactos desta crise na infancia e tentar paliar os danos sufridos, de calquera tipo;
• educar para a saúde a través do xogo, formándonos na adquisición de hábitos de hixiene;
• cumprir co dereito fundamental ao lecer contemplado na Convención dos dereitos do neno e da nena.

E neste verán máis ca nunca estámonos reinventando para compensar os efectos do confinamento coa presenza das persoas adultas de referencia, ao aire libre, promocionando a responsabilidade persoal, a intelixencia emocional, a relación entre iguais en pequenos grupos, a actividade física e a educación na saúde. Cremos necesario máis ca nunca un verán cheo de propostas creativas, lúdicas, formativas, vivenciais que axuden a esta mocidade en pandemia a desenvolver todas a súas capacidades e competencias.