O Palacio de Congresos e Exposicións de A Coruña (Palexco) foi hoxe o escenario onde infancia e adolescencia de toda Galicia alzaron a súa voz para reivindicar os seus dereitos. O acto, organizado pola Plataforma en colaboración coa Xunta de Galicia, celebrouse con motivo do Día Universal da Infancia.
Baixo o lema “Isto vai de dereitos”, os participantes expuxeron propostas sobre cuestións clave como o dereito a ser escoitados, a non discriminación, o xogo e tempo libre, a protección fronte á violencia e o acceso á saúde.
O acto contou coa presenza da conselleira de Política Social e Igualdade, Fabiola García, do concelleiro de Educación da Coruña, Juan Ignacio Borrego, da presidenta da POIG, Mónica Viqueira, e doutras autoridades como a delegada da Xunta na Coruña, Belén Mª do Campo Piñeiro, e a Directora Territorial de Sanidade, María Cristina Pérez Fernández.
Centros participantes no acto
Nenos e nenas de oito colexios presentaron as súas propostas:
- CEIP Plurilingüe Virxe da Luz (Portomarín)
- CPR Maristas Inmaculada (Lugo)
- CEEPR Amicos (Oleiros, Ribeira)
- Colexio Carmelitas Vedruna (Vigo)
- CEIP Igrexa Candeán (Vigo)
- CPR Plurilingüe Virxe da Cela (Monfero)
- CEIP Plurilingüe Eladia Mariño (Cabanas)
- CEIP Plurilingüe de Andrade (Pontedeume)
Un día para a lembranza
Con intervencións, exposicións e actuacións como a do Coro Xove da Orquestra Sinfónica de Galicia, o evento destacou a importancia de dar protagonismo á infancia e á adolescencia.
En resumo, dende a Plataforma, reafirmamos o noso compromiso para seguir traballando en prol dunha infancia e adolescencia empoderada, na que cada voz conte e cada dereito sexa respectado. Porque, como amosaron hoxe os nenos, nenas e adolescentes, os seus dereitos non só importan, son o camiño cara a unha sociedade mellor.
