O vindeiro 19 de novembro, ás 11:30 horas, o Palacio de Exposicións e Congresos (Palexco) da Coruña converterase no centro das voces dos nenos, nenas e adolescentes de Galicia. Nun evento promovido pola Plataforma de Organizacións de Infancia de Galicia, compartirán as súas demandas en defensa e promoción dos seus dereitos cos responsables das políticas de infancia e adolescencia.

Este acto contará coa presenza de Fabiola García, Conselleira de Política Social e Igualdade, e Nereida Canosa, Concelleira de Benestar Social da Coruña. Será un momento especial coa participación do Coro Xove da Orquestra Sinfónica de Galicia, e dúas vogais do Consello Autonómico de Infancia e Adolescencia (CAIA) estarán a cargo da presentación.

Dez centros educativos de toda Galicia sumaranse ao evento, con máis de 400 asistentes. Oito destes centros foron seleccionados para expoñer as súas peticións, abordando temas que consideran esenciais para a súa vida e o seu futuro, como:

• Dereito a ser escoitado e á participación infantil.
• Dereito á non discriminación.
• Dereito ao xogo e tempo libre.
• Dereito á protección fronte á violencia.
• Dereito á saúde.

Os colexios e entidades participantes inclúen:

• CEIP Plurilingüe Virxe da Luz (Portomarín).
• CPR Maristas Inmaculada (Lugo).
• Asociación Amicos (Oleiros, Ribeira).
• Colexio Carmelitas (mediante a Fundación Salma, Vigo).
• CEIP Igrexa-Candeán (mediante a Fundación Salma, Vigo).
• CPR Plurilingüe Virxe da Cela (Monfero).
• CEIP Plurilingüe Eladia Mariño (Cabanas).
• CEIP Plurilingüe de Andrade (Pontedeume).

Os tres últimos colexios participan en colaboración coa Asociación EuroEume.

Tamén asistirán como público, ademais de varias entidades sociais, alumnado de centros como o CEIP Curros Enríquez e o CEIP Eusebio da Guarda, ambos da Coruña.

Este acto será unha oportunidade inesquecible para as nenas e nenos e adolescentes, reforzando o seu compromiso por defender un futuro xusto. Un acto no que se alzarán as súas voces deixando claro que os seus dereitos importan.