O 25 de novembro, lembramos unha realidade que non podemos ignorar, a violencia de xénero segue presente na sociedade, afectando a millóns de persoas, especialmente mulleres e nenas. Este día non é só para conmemorar, senón para reflexionar, actuar e traballar xuntas e xuntos cara a unha sociedade libre de violencia.

Por que é importante falar de violencia de xénero desde a infancia?

A violencia de xénero non xorde de súpeto; as súas raíces están na desigualdade, os estereotipos e a falta de educación afectivo-sexual. Se queremos romper este ciclo, é fundamental educar dende a infancia.

📌 Educar en igualdade é a mellor ferramenta para previr. Falar con nenos, nenas e adolescentes sobre respecto, consentimento, diversidade e empatía é clave para construír relacións sans e igualitarias.

📌 Escoitar as súas voces. A infancia e adolescencia tamén están expostas a formas de violencia, tanto directa como indirecta. Garantir espazos seguros onde poidan expresar o que viven ou observan é imprescindible para actuar a tempo.

📌Talleres e actividades sobre resolución de conflitos. Fomentar habilidades de resolución pacífica de conflitos, ensinando aos rapaces formas de xestionar desacordos ou situacións difíciles sen recurrir á violencia.

📌Campañas de sensibilización nas escolas. Realizar campañas de concienciación que aborden estereotipos de xénero, roles tradicionais e a importancia de respetar as diferenzas e a diversidade, desde os primeiros anos de educación.

Xuntas e xuntos, podemos romper o ciclo

Para a Plataforma o 25N é unha data que nos lembra que non podemos mirar cara outro lado. Debemos actuar, cada día, en cada espazo, para previr a violencia e apoiar a quen a sofre. Porque só xuntas e xuntos podemos construír unha sociedade onde todas as persoas, poidan vivir libres, seguras e con dereitos.