A Sala Azul do Parlamento de Galicia, foi o escenario da sinatura do Pacto galego pola Infancia, rubricado polos portavoces dos catro grupos parlamentarios da cámara galega e a presidenta de Unicef Comité Galicia.

Miguel Ángel Santalices, titular do Parlamento de Galicia, agradeceu a UNICEF Comité Galicia e catro grupos parlamentarios a súa implicación para conseguir rubricar o documento e converter os dereitos da infancia nun obxectivo prioritario. Vinculou tamén a sinatura deste acordo coa aposta por un “Parlamento máis aberto” que está a impulsar desde a a Presidencia da Cámara.

Santalices apuntou que actos deste tipo resultan reconfortantes porque evidencian a capacidade dos grupos parlamentarios para acadar consensos en asuntos tan ambiciosos como os intereses da infancia. Amosouse convencido de que “a moita xente lle gustaría” que se podan repetir fotos deste tipo no futuro e fixo votos para que se poda formalizar un Pacto de Estado pola Infancia.

Participación infantil
Entre os obxectivos recollidos no Pacto Galego pola Infancia figura o exercicio da participación infantil, obxectivo co que o Parlamento de
Galicia «leva anos implicado e materializa a través de sesións plenarias infantís de carácter periódico e organizadas coa colaboración de UNICEF Comité Galicia e de outras entidades que traballan no ámbito da infancia e a adolescencia en Galicia».

O titular do Parlamento de Galicia valorou que un dos obxectivos do pacto
pase por reducir a obesidade e o sobrepeso infantil na Comunidade galega.