93.400 nenas, nenos e adolescentes en Galicia viven en risco de pobreza e/ou exclusión social

• Supoñen máis do 25% da infancia e adolescencia en Galicia
• A taxa de pobreza severa infantil incrementouse case dous puntos este ano ata o 10,3 %
• A Plataforma de Organizacións de Infancia reclama medidas como destinar un mínimo do 5% dos recursos do Fondo Social Europeo do marco plurianual 2021-27 á redución da pobreza infantil; poñer en marcha un plan de choque contra o abandono e o fracaso escolar ou acelerar a tramitación de axudas á alimentación para familias con baixos ingresos con fillos/as ao seu cargo
• Con todo, Galicia mantén unha taxa de pobreza e/ou exclusión social na infancia inferior á media nacional

Santiago de Compostela, 10 de setembro de 2024. O 25,8 % da infancia menor de 18 anos vive en risco de pobreza e/ou exclusión social (taxa AROPE, polas súas siglas en inglés) en Galicia, o que supón que 93.400 nenas, nenos e adolescentes nesta comunidade autónoma están nesta situación, segundo se desprende do ‘Análise da Enquisa de Condicións de Vida con enfoque de infancia en Galicia’, elaborado pola Plataforma de Infancia, en colaboración coa Plataforma de Organizacións de Infancia de Galicia.

A evolución da taxa AROPE en Galicia: unha comparativa histórica

Historicamente, Galicia mantén taxas AROPE entre a poboación infantil inferiores á media nacional, só no 2008 e no 2020 foron superiores. Durante o 2022, a comunidade galega logrou reducir todos os seus valores, pero para o 2023 volvéronse incrementar as taxas de AROPE, pobreza e pobreza severa.

Preocupante incremento da pobreza severa infantil en 2023

Aínda que Galicia conta con valores máis baixos de pobreza infantil que o conxunto do país, os datos son alarmantes. O dato máis preocupante é o aumento da taxa de pobreza severa infantil ata o 10,3 %, que se incrementou case dous puntos este ano, cando a media nacional apenas sufriu variación e sitúase no 13,7 %. A taxa de pobreza infantil en Galicia é do 21,2 %, o que non supón unha variación destacable respecto á do ano anterior (20,9 %). En termos absolutos, isto significa que hai máis de 76.800 nenas, nenos e adolescentes galegos que viven en pobreza monetaria.

Aínda así, Galicia é a segunda comunidade con menor taxa de carencia material severa entre a infancia, sendo esta do 6,6 %, e ocupando tamén o segundo posto entre as rexións que máis diminuíron esta taxa en 2023.

Unha das comunidades con menor pobreza infantil, pero con ingresos por debaixo da media nacional

Na actualidade, Galicia é a cuarta comunidade autónoma con menor taxa de pobreza e/ou exclusión social na infancia. Porén, conta cunha renda media por unidade de consumo de 19.152€, o que supón 1.524€ menos que a media nacional. Ademais, é unha comunidade autónoma envellecida, que conta só con 362.000 nenas, nenos e adolescentes, o que supón o 4,5 % do total de nenas, nenos e adolescentes de España.

Propostas da Plataforma de Organizacións de Infancia de Galicia: Garantía Infantil e axudas contra a pobreza

Á vista dos datos para Galicia, a Plataforma de Organizacións de Infancia de Galicia propón traballar para garantir a Garantía Infantil, destinando un mínimo do 5 % dos recursos do Fondo Social Europeo do marco plurianual 2021-27 á redución da pobreza infantil, para facer fronte aos elevados índices de pobreza que padecen, así como poñer en marcha un plan de choque contra o abandono e o fracaso escolar e acelerar a tramitación de axudas á alimentación para familias con baixos ingresos con fillos/as ao seu cargo.

Así mesmo, propón apoiar na adquisición de medios tecnolóxicos e conexión a internet a estas familias e poñer énfase no desenvolvemento das zonas rurais, para que as nenas, nenos e adolescentes que viven nelas non teñan que abandonalas por falta de recursos, servizos ou oportunidades. Ademais, necesítase implementar medidas de acceso a unha vivenda digna, adecuada e accesible, así como mellorar o acceso á Renda de Inclusión Social de Galicia (RISGA) e ao Ingreso Mínimo Vital (IMV), entre outras medidas.

“É urxente previr a pobreza infantil”, declara a Presidenta da POIG

“As organizacións de infancia de Galicia pedimos que se tomen medidas para paliar a pobreza que afecta ás nenas e nenos, xa que, ano tras ano, a infancia continúa sendo o colectivo co risco máis alto de pobreza de toda a poboación en España. É urxente que sexamos máis ambiciosos na prevención da pobreza infantil”, sinala Mónica Viqueira, Presidenta da Plataforma de Organizacións de Infancia de Galicia.

DESCARGAR INFORME PINCHANDO AQUÍ:

https://infanciagalicia.org/wp-content/uploads/2024/09/Analise-ECV-Enfoque-Infancia-Galicia-2024.pdf