Fundación Aldaba coordina o programa de acollemento En Familia

Fundación Aldaba, despois de xuntarse hai unhas semanas ao programa EN FAMILIA, asume dende este mes de maio, a súa coordinación. A xestión deste proxecto realizase en colaboración coas entidades Faiben (Fundación de Apoio á Infancia e ao Benestar), Manaia (Asociación Galega de Adopción e Acollemento),  Inspectoría María Auxiliadora e Asociación Casa de Familia Santa Joaquina de Vedruna. A tal fin foi subscrito un convenio de colaboración coa Consellería de Política Social da Xunta de Galicia, que financia o proxecto.

O programa En Familia, que conta con cinco persoas traballadoras, ten por obxectivo proporcionar aos nenos e adolescentes en acollemento residencial, de toda Galicia, e sen contactos familiares axeitados, a posibilidade de ser acollidos por familias alleas que se convertan en referentes estables no seu desenvolvemento.

Así, aborda as necesidades non cubertas de nenos, nenas e adolescentes para os que non se prevé unha solución familiar, evitando no posible unha estancia longa nun recurso residencial. O seu funcionamento require do estudo e valoración dos perfís dos nenos, nenas e adolescentes participantes, así como da difusión, captación, formación e valoración das familias colaboradoras adecuadas ás necesidades da persoa menor de idade, así como do acompañamento posterior.