A aprobación da Lei Orgánica 8/2021 de protección integral á infancia e á adolescencia fronte á violencia (LOPIVI), supuxo un gran avance na loita contra a violencia cara á infancia. Entre as novas obrigas establecidas para as entidades que traballan con nenos, nenas e adolescentes, destaca a designación da figura do delegado ou delegada de protección.

Un marco normativo por desenvolver

A LOPIVI é unha lexislación básica que define os aspectos esenciais, deixando en mans das Comunidades Autónomas o seu desenvolvemento. O artigo 148.1.19 da Constitución Española atribúe ás Comunidades Autónomas a competencia en materia de promoción do deporte e uso adecuado do ocio, facéndoas responsables de adaptar as normas xerais da LOPIVI ás necesidades específicas de cada territorio.

No ámbito do ocio e tempo libre, este desenvolvemento normativo debería materializarse nun decreto ou orde autonómica que regule a figura do delegado/a de protección, tal e como propoñen organizacións de infancia. Ademais, sería conveniente incluír esta figura nas leis autonómicas de infancia, permitindo así establecer un réxime sancionador para garantir o cumprimento das obrigas derivadas da LOPIVI.

O papel do delegado/a de protección

O delegado/a de protección debe fomentar unha cultura de bo trato e protección fronte á violencia nas entidades que realizan actividades con infancia e adolescencia. Este obxectivo cumpre a través de catro áreas principais:

1. Implementación: Elaborar políticas de protección adaptadas á entidade e establecer protocolos de actuación ante casos de violencia.
2. Prevención: Avaliar factores de risco e implementar estratexias preventivas.
3. Formación e sensibilización: Formar profesionais, voluntariado e familias para garantir o respecto polos dereitos da infancia.
4. Detección e actuación: Establecer canles de comunicación accesibles e activar protocolos en caso de indicios de violencia.

Estas funcións permiten ás entidades crear entornos seguros e protexer os dereitos da infancia e adolescencia en todo momento.

Por que é urxente a regulación?

A falta dunha normativa autonómica clara e harmonizada dificulta a implementación efectiva da LOPIVI e deixa as entidades nunha posición de incerteza xurídica. O desenvolvemento dunha regulación específica permitiría garantir a igualdade de dereitos e protección de todos os nenos, nenas e adolescentes.

Consulta máis información aquí na seguinte ligazón.