Nas últimas horas España viviu unha crise humanitaria sen precedentes na Cidade Autónoma de Ceuta

Estímase que entraron por Ceuta nas últimas horas 1.500 nenos e nenas: 900 son nenos/as que están sós.

Como Plataforma de Organizacións de Infancia de Galicia puxémonos en contacto co Director Xeral de Familia, Infancia e Dinamización Demográfica da Xunta, Jacobo Rey, para trasladarlle a importancia dunha solución colectiva e solidaria. Trátase de buscar solucións e garantir o cumprimento de todos os dereitos de cada neno, nena e adolescente.

Neste senso, comprácenos a manifestación de intención da Dirección Xeral de colaborar na acollida de menores estranxeiros non acompañados chegados nas últimas horas á Cidade Autónoma.

Desde a POI estatal, está a coordinarse co Ministerio de Dereitos Sociais e Axenda 2030 toda a colaboración posible por parte de todas as organizacións de intervención directa ante un escenario como o actual.

A este respecto, o Consello Territorial acordou liberar as 187 prazas de nenos e nenas tutelados pola Cidade Autónoma nunha repartición proporcional entre as CCAA.

O Ministerio comprometeuse a trasladar ás comunidades un documento técnico coa proposta de repartición de prazas que lle corresponderían a cada Comunidade Autónoma.

Desde a Plataforma de Organizacións de Infancia de Galicia solicitamos que se cumpra a manifestación realizada desde a Dirección Xeral, asumindo solidariamente esta responsabilidade que como sociedade temos cos dereitos da infancia.

Débese facer todo o posible para colaborar e cooperar con esta situación excepcional polo benestar dos  nenos e nenas con  maiores dificultades.