A patronal maioritaria e os sindicatos do sector de protección e reforma da infancia e da adolescencia en Galicia acadaron un fito relevante coa sinatura dun acordo retributivo orientado á igualdade salarial das persoas traballadoras.
Tras un proceso de negociación e procura de consenso, a Asociación Empresarial Galega de Familia, Infancia e Xuventude (GAFIX) e as seccións sindicais CUT, CIG, CCOO e UGT formalizaron un pacto que establece as bases para avanzar na equiparación salarial no conxunto do sector.
Este acordo supón un paso significativo cara á construción dun marco común que garanta condicións retributivas máis xustas, articulándose como un anexo ao convenio colectivo estatal do sector e reforzando o seu alcance legal.
Entre as medidas clave destaca a creación do Complemento Equiparador Autonómico Galego, unha ferramenta destinada a corrixir as desigualdades derivadas da conxelación salarial recollida no V Convenio colectivo estatal de reforma xuvenil e protección de menores, en vigor desde xaneiro de 2026.
A iniciativa dá resposta a unha demanda sostida das persoas traballadoras, orientada a reducir as diferenzas salariais existentes entre profesionais que desempeñan funcións equivalentes dentro do sistema de protección e reforma.
As entidades asinantes subliñan que a efectividade do acordo require da implicación da Administración autonómica. Neste sentido, reclaman que a Xunta de Galicia asuma a actualización do financiamento dos servizos, adaptándoo ao custo real das condicións laborais e garantindo a sustentabilidade e estabilidade do sistema.
Desde GAFIX valoran o acordo como un avance relevante no coidado dos equipos profesionais e na retención do talento no terceiro sector. “Só coidando a quen coida podemos facer o noso labor”, sinalou o seu presidente, Antonio Campanón.
O acordo abre agora unha nova etapa para o sector, centrada na equidade salarial, a dignificación das condicións laborais e o reforzo dun sistema esencial para a protección da infancia e da adolescencia en Galicia.
