Dez membros do Grupo de Participación Infantil e Adolescente da POIG serán nomeados vogais do novo órgano que se constitúe mañá

Santiago de Compostela, 20 abril 2023. O venres 21 de abril terá lugar na Cidade da Cultura de Santiago de Compostela, a constitución do Consello Autonómico de Infancia e Adolescencia de Galicia (CAIA).

A Plataforma de Organizacións de Infancia de Galicia (POIG) celebra a creación deste novo órgano de participación infantil no que estará representada mediante dez vogais membros do seu Grupo de Participación Infantil e Adolescente.

No CAIA haberá tamén cinco representantes dos nenos, nenas e adolescentes do Sistema de Protección da Xunta e quince pertencentes aos consellos locais galegos recoñecidos como Cidades Amigas da Infancia por UNICEF. Todos os vogais deste novo consello autonómico teñen idades comprendidas entre os 8 e os 17 anos.

A creación do CAIA suporá os inicios do foro colexiado de participación infantil da comunidade, que contribuirá a facer realidade o dereito á participación social dos nenos, nenas e adolescentes de Galicia. Dito foro forma parte dunha das reivindicacións de anos atrás de UNICEF e da POIG desde os seus inicios.

Trátase dun órgano que pretende dar a voz aos nenos, nenas e adolescentes integrando a rapaces e rapazas da contorna rural e urbana, ademais de usuarios/as de varios/as colectivos representados mediante as entidades membro da POIG. Dita constitución permitirá visibilizar á infancia e adolescencia como suxeitos activos de dereitos, incidindo na súa mellora segundo a Convención sobre os Dereitos do Neno das Nacións Unidas.

Dende a POIG defendemos a importancia de fomentar mecanismos de consulta a nenas, nenos e adolescentes que sexan realmente participativos e que se potencie a creación destes órganos nos concellos, centros educativos e entidades nas que se traballe con nenos, nenas e adolescentes, para canalizar a opinión da infancia en adolescencia nas decisións que lles afecten.

Sobre a POIG

A Plataforma de Organizacións de Infancia Galega fundada no ano 2018 agrupa a 37 organizacións que comparten o obxectivo de defender, promover e protexer os dereitos das nenas, nenos e adolescentes no territorio galego.