A necesidade de maior reforzo das políticas de infancia para garantir o seu benestar e protección é un dos maiores retos do novo equipo. 

Santiago de Compostela, 7 de marzo de 2024. O pasado martes 5 de  marzo celebrouse a Asamblea Xeral Extraordinaria onde se escolleu a nova Xunta Directiva da Plataforma de Organizacións de Infancia de Galicia (POIG). 

Co obxectivo de protexer e promocionar os dereitos das nenas, nenos e adolescentes no territorio galego e de representar as entidades integradas nesta plataforma esta nova Xunta Directiva idea varios retos. Entre estes camiñar cara un maior fortalecemento da organización e ampliar o seu poder de incidencia política pola defensa dos dereitos da infancia e adolescencia. 

A Xunta Directiva é o órgano de representación e supervisión da organización e entre as súas funcións están: liderar a toma decisións e a execución dos plans de traballo aprobados pola asemblea, exercer a representación da entidade ante os distintos organismos, crear e dirixir os grupos de traballo temáticos e dirixir a xestión dos recursos económicos entre outras. 

Así, quedou aprobada a nova Xunta Directiva para os vindeiros tres anos como así sinalan os seus estatutos, coa seguinte organización: 

• Mónica Viqueira Martínez da FUNDACIÓN EDUCO como Presidenta.
• Victorino Escamilla Paz da FUNDACIÓN EDUCATIVA E ASOCIAL DIGNIDADE como Vicepresidente. 
• Julio Barreiro González, da ASOCIACIÓN ARELA como Secretario. 
• Xesús M. Vilas Otero, da FEDERACIÓN CENTROS XUVENÍS DON BOSCO como Tesoureiro. 
• Andrea Rodríguez Rodríguez do CDR PORTAS ABERTAS como Vogal. 
• Manuel A. Noya Álvarez do IGAXES como Vogal.
• Concepción Estévez Villar da ASOCIACIÓN ASEIA como Vogal.

Adicionalmente, nesta mesma Asemblea, catro novas organizacións solicitaron integrarse na POIG. Despois das correspondentes votacións a Asociación de Familias de Menores Trans ARELAS, a Asociación de Familias Monomarentais de Galicia FAGAMOS, a Asociación Fogares LAR e a Asociación de Iniciativa Social BERCE pasan a formar parte deste equipo que representa xa a 41 entidades que traballan pola defensa dos dereitos dos nenos, nenas e adolescentes, alcanzando así unha maior representatividade do sector de infancia galego. 

Así mesmo, foi aprobado o novo Plan Operativo Anual que pon o foco na necesidade de fortalecemento da estrutura técnica da Plataforma, no maior impulso do traballo de incidencia para unha mellor concreción das políticas públicas para a defensa do benestar da infancia e adolescencia ou na necesidade do traballo para a publicación dunha Lei de Infancia específica para o territorio galego como xa existe na maior parte das península. 

Sobre a POIG 

A Plataforma de Organizacións de Infancia Galega fundada no ano 2018 agrupa a 41 organizacións que comparten o obxectivo de defender, promover e protexer os dereitos das nenas, nenos e adolescentes no territorio galego.