Gratuidade nas escolas infantís 0-3 de iniciativa social e privadas de Galicia

O presidente da Xunta, Alfonso Rueda, anunciou recentemente que o Executivo autonómico investirá 45,7 millóns de euros de fondos propios para consolidar a gratuidade da atención educativa en escolas infantís de iniciativa social e privadas para o 100% do alumnado de 0 a 3 anos no vindeiro curso 2024/25.

Entre estes centros e os de titularidade pública, tanto os propios da Xunta coma os que dependen dos concellos, porase á disposición das familias preto de 32.000 prazas de balde, polo que todos os nenos e nenas que acudan a estas escolas terán cuberta a atención educativa.

Galicia foi pioneira na implantación da gratuidade, un proceso que iniciou no curso 2019/20 para as familias con dous ou máis fillos e que no curso 2022/23 se ampliou ao 100% do alumnado.

Esta nova orde de axudas ten como novidade a prioridade para ás familias con irmáns na escola, a fillos de traballadores do centro e a familias nas que traballan os dous proxenitores ou o proxenitor no caso de familias monoparentais. Isto aplicarase xa en 2025, para o acceso ao curso 2025/26.

A convocatoria sairá proximamente no Diario Oficial de Galicia (DOG) e abrirase o día seguinte ao da súa publicación un mes de prazo para que os centros se acollan a esta medida. As escolas que obteñan o permiso de inicio de actividades con posterioridade á publicación terán de prazo ata o vindeiro 30 de novembro.