O próximo 20 de novembro, Día Internacional dos Dereitos da Infancia, a Plataforma de Organizacións de Infancia de Galicia (POIG) e a Valedora do Pobo colaborarán nun acto para poñer o foco na redución da violencia contra a infancia e adolescencia en Galicia. O evento terá lugar na sede da Valedora do Pobo en Santiago de Compostela, entre as 10:30 e as 11:30 horas, e servirá para impulsar o asentamento da Lei Orgánica de Protección Integral á Infancia e a Adolescencia fronte á Violencia (LOPIVI) en Galicia.

A sesión inaugurada por María Dolores Fernández Galiño, Valedora do Pobo, exporá a importancia de avanzar cara á creación de espazos seguros e protexidos para a infancia. A continuación, realizarase unha presentación das principais preocupacións sobre a violencia que afecta a nenos, nenas e adolescentes en Galicia, un tema que as entidades membro da POIG consideran unha prioridade crítica.

O acto contará coa intervención dunha persoa experta en violencia contra a infancia, quen detallará os retos máis urxentes que afronta a nosa comunidade para aplicar de maneira eficaz a LOPIVI. Entre estes retos atópanse a mellora da coordinación entre institucións, a formación dos profesionais que traballan con menores de idade e a sensibilización social sobre o impacto da violencia infantil.

A LOPIVI, aprobada en 2021, establece un marco integral para a protección de nenos, nenas e adolescentes contra todo tipo de violencia. A lei propón medidas preventivas, así como protocolos de actuación e protección en diferentes ámbitos, desde o educativo ata o social e familiar, co fin de garantir o dereito a vivir nunha contorna seguro e libre de violencia. Este acto conxunto subliña o compromiso da POIG e da Valedora do Pobo en defender e facer efectiva esta lei en Galicia.