Coincidindo co Día Universal dos Dereitos da Infancia, a Plataforma de Organizacións de Infancia de Galicia (POIG) celebrou un acto conxunto coa Valedora do Pobo na súa sede de Santiago de Compostela. O encontro puxo o foco na prevención e redución da violencia contra nenos, nenas e adolescentes, destacando que só entre un 10 e un 15% dos casos de violencia son denunciados.

A Valedora do Pobo, María Dolores Fernández Galiño, inaugurou o acto remarcando a importancia de crear espazos seguros e protexidos para a infancia. Ademais, participaron:

• Mónica Viqueira, presidenta da POIG.
• Bibiana Araújo, coordinadora da Asociación Amino.
• Duas representantes do Consello Autonómico de Participación Infantil e Adolescente (CAIA), quen achegaron a súa visión e propostas.

A voz da infancia e a adolescencia

Dúas vogais do CAIA reivindicaron o papel activo dos/as adolescentes, sinalando que non son «seres sen pensamento crítico». Durante a súa intervención, expuxeron que moitas persoas novas non recoñecen situacións de violencia nin teñen claro a quen acudir en caso de necesidade. Propoñeron medidas como:

• A introdución de cursos obrigatorios para a infancia e adolescencia e as súas familias.
• A unificación de protocolos de actuación fronte á violencia.
• A presentación ao inicio de curso da figura do coordinador de benestar nos centros educativos.

A LOPIVI en Galicia

O acto puxo de manifesto a importancia de seguir incidindo na Lei Orgánica de Protección Integral á Infancia e a Adolescencia fronte á Violencia. Os/as participantes subliñaron a necesidade de garantir os recursos e mecanismos necesarios para asegurar que nenos, nenas e adolescentes vivan en contornas libres de violencia.

Este acto forma parte das actividades promovidas pola POIG co motivo do Día Universal dos Dereitos da Infancia, unha data que conmemora a adopción da Declaración Universal dos Dereitos do Neno (1959) e a Convención dos Dereitos do Neno (1989), marco esencial para a defensa dos seus dereitos.