• A convivencia de diferentes sistemas de bolsa comedor (autonómicos e municipais) xera diferenzas territoriais, segundo un informe da ONG que analiza os sistemas para dar esta axuda nas 17 comunidades autónomas.
• Educo lamenta que un millón de nenos e nenas sen recursos quedan sen bolsa comedor en España este curso e propón “a receita deste curso”: 10 ingredientes para que o sistema de bolsas asegure o acceso ao comedor da infancia en risco de pobreza, independentemente do lugar de residencia.

14 de setembro de 2023. Con motivo do inicio do curso escolar, cos elevados prezos que están a alcanzar os alimentos, Educo alerta que en Galicia non todas as familias sen recursos acceden nas mesmas condicións a unha bolsa comedor.

A ONG publicou un informe Receitas que educan. Os 10 ingredientes dunha boa política de bolsas e axudas ao comedor escolar que analiza os sistemas para dar esta axuda económica nas 17 comunidades autónomas, Ceuta e Melilla. O informe distingue os 10 ingredientes que debería ter un bo sistema de bolsas e axudas para o comedor para que toda a infancia en situación de pobreza acceda a este espazo.

En Galicia, o acceso ao comedor en primaria é superior á media estatal (49% versus o 44%) e as familias en risco de pobreza obteñen bolsas ao 100% na maioría dos casos. Con todo, conviven diferentes sistemas de bolsas públicas, aqueles que dependen do goberno autonómico e aqueles que dependen dos gobernos municipais.

Esta situación xera desigualdade territorial entre municipios ou comarcas dentro da comunidade autónoma. Nenos, nenas e adolescentes, segundo onde vivan, poden recibir bolsas ou non recibilas. Atópanse diferenzas nos criterios que se empregan para outorgar estas bolsas, por exemplo, nos niveis de renda que se esixen para ter acceso a estas. Diferenzas en canto ao calendario de tramitación, o alumnado de certos municipios comeza o curso sen saber se se lles outorgou ou non a axuda. Por outra banda, os montos asignados a estes programas ou o proceso de tramitación tamén son diferentes entre os distintos territorios.

“A participación das administracións locais parécenos moi valiosa para xerar políticas de proximidade. Pero a falta de harmonización entre as distintas bases xera desigualdade e non garante que toda a infancia vulnerable acceda ao comedor escolar en igualdade de condicións”, afirma Mónica Viqueira, responsable de Educo en Galicia. “Desde Educo consideramos que o acceso ao espazo de mediodía forma parte do dereito á educación e, por tanto, debería ser gratuíto para todos os nenos e nenas, independentemente da situación económica das súas familias. Á parte de garantir unha boa alimentación, tamén ofrece a oportunidade de aprender hábitos nutricionais e sociais nunha contorna segura. Ninguén debería quedar fóra dese espazo que garante a igualdade de oportunidades”, engade.

En España, un millón de nenos e nenas vulnerables quedan sen comedor
En España, case un de cada tres menores de 18 anos – o 27,8% – vive en risco de pobreza, pero as bolsas comedor só alcanzan o 13%. Isto significa que case un millón de nenos e nenas que deberían recibir unha bolsa comedor quedan sen esta opción.

O informe de Educo mostra que os complexos sistemas de bolsas das diferentes
comunidades autónomas explica, en gran parte, que haxa tantas familias sen recursos
que non poden levar aos seus fillos e fillas ao comedor escolar. Polo xeral, todos os sistemas pódense mellorar e algúns mostran grandes carencias. Tamén queda patente que as diferenzas entre territorios determinan recibir (ou non) a bolsa comedor segundo o seu lugar de residencia.

Desde 2013 Educo repartiu 59.000 bolsas comedor e facilitou máis de cinco millóns de comidas a nenos e nenas de todo o Estado. Actualmente, a ONG ten en marcha a campaña “Receitas que educan” que inclúe un reto solidario por conseguir, co apoio da cidadanía e as empresas, repartir seis millóns de comidas a finais de ano.

Sobre Educo:

Educo forma parte da Plataforma de Organizacións de Infancia de Galicia dende a súa creación. Desde hai máis de 30 anos, traballa na defensa dos dereitos da infancia; especialmente o seu dereito para recibir unha educación de calidade. Actualmente levamos a cabo 201 proxectos en 17 países nos que participan 1 millón de nenos, nenas, adolescentes e novas. Tamén formamos parte da alianza internacional ChildFund, o que permite que o noso apoio chegue a máis países e persoas.