Dentro dos actos promovidos pola Plataforma de Organizacións de Infancia de Galicia polo Día Universal da Infancia

• A sede da Valedora acolleu hoxe un acto no que participaron o presidente da Plataforma de Organizacións de Infancia de Galicia, Xesús Vilas; a responsable de Participación Infantil da Plataforma de Infancia estatal, Mabel Taravilla; rapaces representantes do Consello Autonómico de Infancia e Adolescencia (CAIA); e a propia Valedora do Pobo, María Dolores Fernández Galiño
• Trátase dun dos catro principios fundamentais da Convención dos Dereitos do Neno, xunto ao de non discriminación, interese superior do neno e o dereito á vida, a supervivencia e o desenvolvemento
• O pasado luns 20 de novembro, con motivo do Día Mundial da Infancia, cerca de 200 nenos, nenas e adolescentes galegos fixeron uso deste dereito expoñendo as súas demandas nun acto na Cidade da Cultura organizado pola POIG en colaboración coa Xunta

Santiago de Compostela, 27 de novembro. A Valedora do Pobo sumouse hoxe á reivindicación do dereito á participación infantil nun acto, promovido pola Plataforma de Organizacións de Infancia de Galicia (POIG), que tivo lugar na sede da Valedora, en Santiago de Compostela. Na xornada, na que tamén participaron o presidente da POIG, Xesús Vilas; a responsable de Participación Infantil da Plataforma de Infancia estatal, Mabel Taravilla; rapaces representantes do Consello Autonómico de Infancia e Adolescencia (CAIA); e a propia Valedora do Pobo, María Dolores Fernández Galiño, manifestouse a necesidade de apoiar e seguir avanzando na procura deste dereito para todos os nenos, nenas e adolescentes.

Este acto atópase no marco das accións postas en marcha pola POIG con motivo do Día Universal da Infancia, no que se conmemora o aniversario da adopción da Declaración Universal dos Dereitos do Neno (1959) e a aprobación da Convención dos Dereitos do Neno (1989). Esta Convención, a máis universal dos tratados internacionais, establece una serie de dereitos para os nenos e nenas, incluídos os relativos á vida, a saúde e a educación, o dereito a xogar, á vida familiar, á protección fronte á violencia e á discriminación, e a que as súas opinión sexan escoitadas.

Co gallo desta efeméride, a POIG, que aglutina a 37 entidades que traballan en favor da infancia, puxo en marcha unha campaña para visibilizar as necesidades das persoas menores de idade, nomeadamente as relativas á infancia en situación de vulnerabilidade. Neste contexto, o pasado 20 de novembro leuse no Parlamento galego unha declaración institucional elaborada de forma conxunta con UNICEF na que a POIG reclamou a necesidade de impulsar políticas que dean prioridade a preservación familiar.

200 nenos, nenas e adolescentes galegos alzaron a voz no Día da Infancia

Tamén o luns 20 de novembro, Día Universal da Infancia, cerca de 200 nenos, nenas e adolescentes galegos alzaron a súa voz para reivindicar os dereitos da infancia nun acto organizado pola Plataforma de Organizacións de Infancia de Galicia en colaboración coa Xunta e que tivo lugar na Cidade da Cultura. O obxectivo desde acto, ao que tamén asistiron a vicepresidenta da POIG, Mónica Viqueira, e o director xeral de Familia, Infancia e Dinamización Demográfica da Xunta de Galicia, Jacobo Rey, foi darlle voz á infancia e adolescencia para que expresasen as súas propostas, facendo uso da participación infantil como dereito fundamental.

Os rapaces, con idades comprendidas entre os 8 e os 14 anos e pertencentes aos CEIP Víctor Sáenz (Mazaricos), Labarta Pose (Zas), Alborada (Coruña), Rosalía de Castro (Xinzo de Limia), Carmelitas (Ourense) e Fundación Down Compostela, expuxeron as conclusións das actividades realizadas no proceso participativo que cada ano convoca a Plataforma de Organizacións da Infancia co obxectivo de que as opinións dos nenos e nenas sexan tidas en conta nas políticas públicas e que este 2023 desenvolveuse baixo o paraugas das problemáticas asociadas á pobreza na infancia. Co lema do acto As nosas opinións importan, os participantes agruparon as súas propostas en cinco ámbitos de actuación: bens de primeira necesidade, pobreza e infancia, ocio e cultura, educación e saúde.

Sobre a Plataforma de Organizacións de Infancia de Galicia

A Plataforma de Organizacións de Infancia de Galicia (POIG) é unha entidade que aglutina a 37 entidades co obxectivo principal da protección e promoción dos Dereitos da Infancia recollidos na Convención sobre os Dereitos do Neno das Nacións Unidas do 20 de novembro de 1989.

No marco da participación infantil, a plataforma pretende incidir e promover espazos nos que os nenos, nenas e adolescentes galegos se sintan libres para opinar, facilitando que as súas demandas sexan tidas en conta nas políticas que máis lles afectan.