O 21 de novembro a POIG celebrou o Acto Central polo Día Universal dos Dereitos da Infancia coa Consellería de Política Social da Xunta no Centro Galego de Arte Contemporáneo (CGAC), con douscentos nenos e nenas de toda Galicia.

No acto, diferentes grupos de nenos e nenas de toda Galicia expuxeron as súas demandas en forma de dereitos aos responsables das políticas de infancia, dentro do proceso participativo que este ano leva o lema de «Participamos: É o noso dereito!» 

O acto, presentado por Aroha e Matteus do Colexio Carmelitas de Ourense, comezou coas intervencións de Xesús Vilas, Presidente da POIG, quen foi a voz dos nenos e nenas do Grupo de Participación Infantil e Adolescente da plataforma lendo o manifesto realizado por eles e elas.

A continuación Cristina Blanco, Subdirectora Xeral de Política Familiar, Infancia e Adolescencia, agradeceu a asistencia dos e das nenas asistentes, resaltando a importancia da Participación como dereito primordial e anunciando a posta no Portal de Transparencia da Xunta do Proxecto de decreto polo cal se crea e regula o Consello Autonómico de Infancia e Adolescencia.

Xusto antes do inicio das intervencións dos grupos de nenos e nenas, a Pianoma Music School colaborou mediante diferentes contos con música «Los elefantes y las tortugas» y «El cuco», amenizando os dereitos que a infancia presente escolleu para presentar.

As intervencións contaron co vídeo da Fundación Secretariado Gitano de Pontevedra, no que presentaron o proceso participativo polo Día da Infancia. No mesmo, nenos e nenas da fundación, así coma os seus pais, resaltaron a importancia da participación. Ademais, resaltaron que debe ser realizada en igualdade de condicións para todas as nenas e nenos.

O CPR A Inmaculada Maristas de Lugo iniciaron as presentacións mediante un vídeo e a súa explicación, recalcando a importancia de que aos nenos e nenas se lles escoite. Dar a voz á infancia é importante e a xente adulta non sempre é consciente desta necesidade para mellorar o benestar da infancia.

A continuación, a Asociación Amencer de ASPACE elexiron como dereitos para expoñer o dereito ao xogo e o dereito á intimidade.

Mediante vídeos e con posterioridade exemplificando a existencia de diferentes formas e linguaxes para que os nenos e nenas poidan comunicarse, amosaron a importancia do xogo e o dereito á intimidade. É necesario que elas e eles poidan elexir as persoas que desexen que as coiden, por exemplo «teñen dereito a elexir con quen queren ir ao baño».

O CPR Plurilingüe Luis Vives de Ourense continuou o acto explicando a importancia da non violencia e acoso escolar.

Mediante unha presentación, a proxección dunha entrevista realizada con anterioridade pola TVG ao centro sobre educar na non violencia, e mediante a canción Se buscan valientes, amosaron a importancia deste dereito.

A continuación o CPI Plurilingüe Virxe da Cela de Monfero, mediante a coordinación e as actividades realizadas desde Ayuda en Acción, proxectaron un vídeo no cal explicaron o dereito á igualdade e a non discriminación, ademais, non quixeron perder a oportunidade de subir a explicar o seu significado.

Tampouco quixeron pasar por alto a importancia de que ningún neno ou nena se sinta discriminad@ polo feito de selo.

Continuaron os rapaces e rapazas o Colexio Plurilingüe Santa Teresa de Jesús – Carmelitas de Ourense, explicando o dereito á educación.

Mozos e mozas foron subindo ao escenario explicando a importancia de cada palabra iniciada coas iniciais da palabra EDUCACION.

Para finalizar o acto o CEIP Labarta Pose de Zas, coordinados e mediante as actividades realizadas polo Día da Infancia desde Ayuda en Acción, quixeron facer fincapé na importancia de que todos os nenos e nenas teñan acceso á educación. Para iso, proxectaron un vídeo no que mozos e mozas do colexio contan a historia de «O neno dos pasos tristes».

Xa para finalizar, Cristina Blanco, Xesús Vilas e os douscentos nenos, nenas e adolescentes asistentes ao acto, subiron ao escenario a realizar unha foto colectiva que lles lembre este día.

Non quixeron perderse o acto entidades pertencentes á plataforma, que tamén foron partícipes das demandas achegadas desde os diferentes grupos de infancia e adolescencia galega.

Con este acto danse por finalizadas as accións presenciais do proxecto “Dereitos da Infancia: aprenden e participan nos seus dereitos”, apoiado desde a Consellería de Política Social.

Grazas a todas e a todos por participar!!

A POIG é unha asociación conformada por 37 entidades da comunidade, sen prexuízo de realizar actuacións estatais e internacionais a favor do bo trato á infancia e adolescencia en Galicia, para protexer e promocionar os seus dereitos fundamentais. O seu interese é incrementar o benestar da infancia, denunciar e facer seguimento das situación que vulneren os dereitos das persoas menores de idade.

.