Fundación Meniños

2016

A necesidade de saber de onde vimos e cal é a nosa historia, con continuidade e mantendo referencias, é inherente ás persoas. Necesitamos comprender a realidade que vivimos. O desenvolvemento desta historia depende de como unimos acontecementos nunha secuencia e dámoslles un significado.

No caso de nenos e nenas que se atopan en situación de desprotección, que viviron separacións e que tiveron vivencias negativas ou traumáticas na súa historia persoal, cando a situación familiar é confusa… en ocasións atópanse espazos en branco e “buracos” ou “lagoas” que requiren ser completados.

Co apoio do Ministerio de Sanidade, Servizos Sociais e Igualdade do Goberno de España, a Fundación Meniños elaborou este traballo encamiñado a intervir con nenos e nenas en acollemento familiar ou garda con fins adoptivos, coa finalidade de abordar de forma reparadora a súa historia de vida, atendendo ás súas necesidades e ás dificultades vividas a través de material e metodoloxía específica, que axude a amortecer o dano que a desprotección lles produciu.